Дијана Иваноска со својот талент за комбинација на вкусови нè носи на едно исклучително гастрономско патување. Иваноска стои зад инстаграм-профилот „Dash of Spice“ и ни ги открива малите тајни за создавање магија од вкусови.

Инвентивната Дијана денеска споделува рецепт за едно гастрономско уживање – бисквитни путер колачи (scones) со јагоди.

Состојки

• 250 грама јагоди исечкани
• 280 грама брашно
• 50 грама шеќер
• 10 грама прашок за печиво
• 1/4 лажиче сол
• 80 грама путер ладен и исечкан на коцки
• 1 јајце
• 120 мл јогурт
• 1 јајце за премачкување или млеко
• шеќер за посипување

Подготовка

Загрејте ја рерната на 200 степени Целзиусови. Обложете тавче со хартија за печење.

Во подлабок сад измешајте го брашното, шеќерот, печивото и солта.

Додаjте го ладниот путер и тријте го во брашното додека добиете ронлива смеса.

Измешајте ги полека јагодите низ брашното.

Соединете ги јогуртот и јајцето и додајте ги на смесата. Измешајте додека се спои убаво.

На набрашнета работна површина натапкајте го нежно тестото и оформете диск 20 цм. Поделете го тестото на осум триаголници.

Наредете ги на тавчето и премачкајте ги со изматено јајце или со млеко. Наросете крупен шеќер одозгора за да добиете крцкава кора (опционално).

Печете 20-30 минути или додека добие убава боја.

Послужете ги како што се или со прелив по желба.