Улицата Козара, веднаш до влезот на училиштето „Киро Глигоров“ во Капиштец од утрово е блокирана, затоа што преку коловозот се паднати две дрва. За среќа, како што кажуваат родители кои ги носеле децата на училиште, најверојатно двете паднале во текот на ноќта или рано наутро, па никој не е повреден.

Станува збор за големи дрвја, при што едното паднало врз другото, па го откорнало од корен и двете во моментов се легнати преку улицата.

Родители сведочат дека уште пред десетина дена пријавиле во Општина Центар дека дрвото е опасно накривено, па од таму ги упатиле во Град Скопје и во ЈП „Паркови и зеленило“.

Но, со оглед на фактот дека самата процедура од пријавување, до издавање решенија и законски рок за жалби, па додека екипите излезат на терен трае долго, во меѓувреме дрвото паднало и со себе повлекло уште едно. Притоа, дрвото не било обележано ни за сечење.

Од утрово, сообраќајот на оваа улица е блокиран, а како што дознаваме, пред малку стигнале и екипи од „Паркови и зеленило“ и од ПОЦ, кои започпнале да ги сечат паднатите дрвја, за да ги отстранат од улицата. Од Општина Центар тврдат дека улицата ќе биде проодна за сообраќај за еден час.