Филмски фестивал во Венеција: „Златниот лав“ отиде во рацете на Одри Диван, најдобра актерка е Пенелопе Круз
Претседателот на жирито, корејскиот оскаровец Бонг Јон-хо, рече дека победникот го избрале едногласно
Филмот „Настан“ на француската режисерка Одри Диван, го освои „Златниот лав“ на 78. издание на Венецискиот филмски фестивал. Се работи зае драма посветена на една млада девојка од 60-тите години на минатиот век, која се подготвува за абортус. Претседателот на жирито, корејскиот оскаровец Бонг Јон-хо, рече дека победникот го избрале едногласно. „Настан“ ја освои и наградата на критиката – ФИПРЕСЦИ.
Диван е шеста жена која освоила „Златен лав“ досега. Пред неа се Клое Жао, која годинава беше членка на жирито, а лани победи со „Земја на номади“, Маргарета Фон Трота со „Маријане и Јулијане“, Ањес Варда со „Вагабонд“, Мира Наир со „Монсунска венчавка“ и Софија Копола со „Некаде“.
Паоло Сорентино освои „Сребрен лав“ за најдобар филм за „Божја рака“, а Филипо Скоти за најдобар млад актер за улогата во овој филм. Џејн Кемпион освои „Сребрен лав“ за најдобра режија за „Моќта на песот“. Меги Џиленхал е наградена за најдобро сценарио за нејзиното режисерско деби „Изгубената ќерка“.
Пенелопе Круз освои награда за најдобра актерка за „Паралелни мајки“ на Педро Алмодовар, а најдобар актер е Филипинецот Џон Арчила во „На работа: Исчезнатите 8“. Италијанскиот автор Микеланџело Фрамартино освои Специјална награда на жирито за „Дупка“.
View this post on Instagram
Во селекцијата „Хоризонти“, светска премиера имаше и косовскиот филм „Вера сонува за морето“ на дебитантката Калтрина Красниќи, во кој копродуцент е и Македонија со „Дрим фектори“. „Вера сонува за морето“ освои две од паралелните награди на Венецискиот фестивал кои ги доделуваат други институции. Дебито на Красниќи ја освои специјалната награда „Валентина Педичини – авторки под 40 години“. Исто така, ја освои и наградата „Едипо Ре за инклузија“, што ја доделува Универзитетот во Падова и на филмот ќе му донесе кинодистрибуција во 5 италијански градови.
View this post on Instagram
Во филмот главната улога ја игра макдонската актерка Теута Ајдини-Јегени, а игра и Рефет Абази. Сценариото е на Дорутина Баша, кинематографер е Севдије Кастрати, монтажер е Владимир Павловски, снимател на звук е Игор Поповски, композитор е Петрит Чеку, дизајнер на звук е Дарко Спасовски, а македонски продуцент е Огнен Антов.
