Оставката на Арбен Фетаи од функцијата заменик-претседател на Владата задолжен за добро владеење ја отвори првата посериозна политичка епизода во пресрет на најавената јунска реконструкција на владиниот кабинет.

Неговото заминување следуваше по неколкунеделни шпекулации и најави, но со формалното поднесување на оставката процесот влезе во институционална фаза, а премиерот Христијан Мицкоски потврди дека Владата ќе разговара со коалициските партнери за следните чекори.

Со крената глава и со чиста совест

Фетаи ја достави оставката до премиерот Мицкоски, со порака дека одлуката е добро промислена и дека функцијата ја напушта „со крената глава и со чиста совест“.

Во своето обраќање тој ја нагласи улогата што ја имал во реформите поврзани со отчетноста, транспарентноста и владеењето на правото, но и посочи дека мисијата на која работел била важна и неблагодарна.

– Денеска му ја доставив на премиерот мојата оставка од функцијата заменик-претседател на Владата задолжен за добро владеење. Во текот на овие две години имав чест и привилегија да ѝ служам на државата придонесувајќи за реформи насочени кон зајакнување на отчетноста, транспарентноста и владеењето на правото – мисија што е истовремено важна и неблагодарна. Заминувам со крената глава и со чиста совест. Ова е добро промислена одлука, донесена со уверување дека во сегашните околности тоа е најисправниот и најдостоинствениот чекор – соопшти Фетаи.

Кој предава, ќе биде предаден

Алијансата за Албанците излезе со остра реакција, во која го поврза случајот со внатрешните политички односи и со довербата што, според партијата, Фетаи ја добил од Арбен Таравари.

Од партијата оценија дека Фетаи бил донесен од Брисел и дека му била дадена можност да извршува висока функција со значајна политичка тежина.

– Арбен Таравари е човекот што го донесе Арбен Фетаи од Брисел, му веруваше, го поддржа и му ја даде можноста да служи како министер со одлучувачка моќ. Очигледно, Фетаи на оваа доверба возврати со предавство. Наместо благодарност, соработка и придонес во партијата, тој ја изневери довербата и му заби нож во грб со своите одлуки. Но, постои една изрека – кој предава, ќе биде предаден. И самиот Фетаи го почувствува предавството од луѓе кои ги сметал за доверливи – велат од Алијанса за Албанците.

Мицкоски има други приоритети

Премиерот Христијан Мицкоски го потврди заминувањето на Фетаи од извршната власт и најави дека неговата оставка ќе биде разгледана и архивирана. Во истата изјава тој ја поврза ситуацијата со претстојната реконструкција на Владата, која треба да се случи во јуни.

– Господинот Фетаи поднесе оставка. До крајот на денот ќе биде разгледана, а потоа ќе биде архивирана. Како што знаете, во втората половина на јуни нè очекува реконструкција на Владата. Сега сме посветени на внатрепартиските поместувања и реконструирања, тоа отприлика планираме да го завршиме до средината на месецов, а веќе во втората половина од јуни ќе седнеме со нашите коалициски партнери во рамките на Владата и ќе разговараме – изјави Мицкоски.

Со ова, случајот Фетаи станува дел од поширокиот процес на прераспределба во владиниот состав. Засега не се открива кој би можел да го наследи на функцијата, ниту колку длабока ќе биде најавената реконструкција. Но, неговото заминување веќе отвори две паралелни прашања: како Владата ќе го пополни испразнетото место задолжено за добро владеење и како оваа оставка ќе се одрази врз односите меѓу коалициските партнери.

Во политичка смисла, оставката доаѓа во чувствителен момент за владиното мнозинство. Јунската реконструкција беше најавувана како процес на разговори со коалициските партнери, а случајот со Фетаи сега ѝ дава конкретна кадровска тежина.

Вицепремиерот Арбен Фетаи добил смртна закана на службениот мејл