Првиот натпревар вечерва на Националната арена „Тодор Проески“ – Скопје во второто квалификациско коло на Лига Европа, заврши со пораз на Шкендија од 1:2.

Агим Ибраими донесе водство во првото полувреме, но за три минути гостите направија изненадувачки пресврт во вториот дел.

– Ова е одличен резултат за нас, можеби и пред почетокот не очекувавме ваков епилог. Дефинитивно Шкендија покажа доминација, во составот имаат квалитетни играчи. Без сомнение и на реваншот ќе ни биде тешко. Не очекувавме така лесно да направиме пресврт, нивниот голман им направи грешка, а ние ги искористивме шансите. Но, од друга страна ништо не е готово, сигурен сум дека противникот ќе сака уште посилно да напаѓа на возвратниот дуел. Секако освен фудбалската филозофија, потребно е и малку среќа на натпреварите – изјави тренерот на Дуделанж, Емилио Фереира на прес конференцијата после мечот.

Реванш мечот ќе се игра во Луксембург на 30 јули исто така од 17.55 часот на стадионот „Жози Бартељ“.

Да потсетиме победникот од овој двомеч во третото квалификациско коло на ЛЕ, ќе игра против елиминираниот од пресметката Селтик-Номе Калју.