Секој, па и најмал балкон може да се уреди според правилата на фенг шуи, доколку сте расположени за еден таков потфат и сакате од балконот да направите пријатно место за дружење, читање или уживање во самотија.

Според фенг шуи теориите, надворешниот простор е продолжение на домот и директно се рефлектира на нашиот живот. Најважно е да се постигне хармонија – количината на мебел и билките и нивните димензии треба да одговараат со големината на просторот.

Билките симболизираат раст и развој, па затоа треба да се одржуваат здрави, а кога ќе почнат да венеат задолжително да се заменат. Тие претставуваат и добра звучна бариера од вревата на улица, а можат и да го сокријат вашиот простор за уживање од несакани погледи.

При избор на цвеќе за балконот, според фенг шуи, се советува билките да не растат надолу, да немаат трња и овални, заоблени листови. Треба да се избегнуваат билки со остри листови што личат на сабји.

Бонсаи по фенг шуи не се препорачува затоа што се смета за спротивен на природата. За посебно погодни пак се сметаат лимон и лимет.

Најповолни материјали за предметите на балконот се природните – од глина и керамика.

Најповолни материјали за мебелот се одредуваат според страната на која се наоѓа балконот. Ако тој е на запад, северозапад или на север, најдобар избор е метал. За балкони на исток и југоисток се препорачува мебел од дрво или бамбус, додека пак за балкони на јужната страна се препорачува пластика. Кај југозападните и североисточните балкони, освен камен, може да се избере и пластика.

Фенг шуи принципи

– Секој ден, барем на 20 минути, отворете го прозорецот или вратата од балконот, без оглед на времето надвор, за свежа енергија да го исполни просторот.

– Старите полици и мебел на балконот обновете ги со бојадисување и поставување на нови билки и украси. Во жардињерите посадете билки со низок раст или зачини.

– Трудете се на балконот секогаш да има доволно простор за поминување, за да не се наруши фенг шуи хармонијата.

– Фрлете се што е непотребно, ослободете простор за дружење.

– Не оставајте го дрвениот мебел незаштитен, затоа што на отворено може да се оштети, а најлошо е да се има трул мебел.

– Избегнувајте да ставате стаклени предмети на балконот, а доколку имате оштетени или напукнати тегли, фрлете ги веднаш.