Сигурно многупати сте се изнервирале поради прекумерното потење, кое знае да биде многу непријатно и сте посакале повеќе да не почувствувате капка пот на себе.

Извинете, но потењето е од витално значење за регулирање на температурата на телото и за ладење, помагајќи ни да избегнеме топлотен удар и топлотна исцрпеност, што во ретки случаи може да биде смртоносно.

„Како што внатрешната температура на вашето тело почнува да расте, хипоталамусот – мала област во вашиот мозок – им кажува на екрините потни жлезди низ целото тело да почнат да ве ладат со производство на пот“, вели Абас Канани, фармацевт од Chemistclick.co.uk.

Што предизвикува прекумерно потење?

Сите ние имаме сличен број на потни жлезди, од два до четири милиони, но некои се поактивни од другите поради повеќе причини.

Телесна тежина

Фармацевтот вели дека луѓето кои имаат поголема телесна тежина имаат тенденција да создаваат повеќе топлина и повеќе да се потат.

„Мускулната маса, исто така, произведува повеќе топлина отколку маснотии, така што двајца луѓе со иста телесна тежина може да имаат многу различни стапки на пот“, додава тој.

Хормони

За тоа може да бидат виновни флуктуациите, како што е тоа случај во текот на бременоста или перименопаузата и менопаузата.

„Еден пример се топлите бранови, каде што падот на естрогенот може да предизвика жлездите да ослободуваат поголеми количества други хормони кои влијаат на термостатот на мозокот и предизвикуваат флуктуација во телесната температура и потењето“, објаснува Абас, додавајќи дека во бременоста, како и кај промените на хормоните, постои и зголемување на дотокот на крв во кожата со кој треба да се справи.

Подобрувањето на нивото на кондиција може да го намали потењето

Потењето во текот на вежбањето е природно, но луѓето со пониско ниво на кондиција може всушност да се потат повеќе затоа што трошат повеќе енергија за да ја завршат задачата отколку кога личноста е во форма.

Обидете се постепено да ја зголемувате количината на вежбање.

Болест

Можете повеќе да се потите кога не ви е добро, бидејќи вашиот имунолошки систем се бори против болеста или инфекцијата.

Хиперхидроза

Посетете го вашиот матичен лекар ако претерано се потите повеќе од шест месеци.

„Хиперхидрозата е состојба која се појавува поради прекумерна стимулација на потните жлезди“, вели д-р Хазим Садидин, пластичен хирург во клиниката „Кадоган“.

Се смета дека пациентите со примарна хиперхидроза, која е почеста, имаат базално ниво на производство на пот повеќе од нормалното. Додека секундарната хиперхидроза се појавува поради основните здравствени состојби, како што се хормоналните нарушувања или употребата на одредени лекови, пишува британски „Сан“.

Стручни совети за луѓето кои повеќе се потат

Пијте течности

Можеби изгледа малку чудно да пиете повеќе течности за да го избегнете потењето, но течностите помагаат телото да ви биде ладно, за да не мора да се поти толку многу за да се ослободи дополнителната топлина.

„Дехидратацијата исто така може да предизвика повеќе да се потите, бидејќи вашето тело работи понапорно за да функционира правилно“, вели личниот тренер Том Пен.

Намалете го внесот на мрсна храна

„Храната богата со маснотии може да предизвика загревање додека телото ја обработува, што доведува до зголемено потење“, вели Абас.

Ова вклучува чипс, колачи и преработено месо. Дајте предност на маслиновото масло, кое е богато со антиоксиданти, лесно се вари, го поттикнува метаболизмот и помага во регулирање на нивото на потење.

Избегнувајте зачинета храна

Како што можете да замислите, врелата, зачинета храна може да направи повеќе да се потите. Изладете се со јогурт и префрлете се на овошје и зеленчук со висока содржина на вода.

Пробајте лубеница, грозје и брокула за да ја зголемите хидратацијата. Кофеинот исто така може да го зголеми потењето, затоа обидете се да не го консумирате премногу.

Спијте доволно

Некои студии открија врска помеѓу недостатокот на сон и нарушената регулација на топлината во телото.

„Ако лошиот сон влијае на нивото на хормоните, и обратно, може да предизвика симптоми како што се топли бранови, т. н. валунзи, потење и ноќно потење“, вели Абас, кој препорачува да се обидете да спиете седум до девет часа во текот на ноќта.

Ноќното потење може да биде сериозно ако е поврзано со одредени медицински состојби (како туберкулоза, некои видови рак или инфекции на коските), па ако одеднаш почувствувате ново ноќно потење, разговарајте со вашиот матичен лекар.

Стрес

Стресот може да предизвика зголемување на телесната температура, предизвикувајќи активирање на потните жлезди – оттука и причината зошто вашите дланки и стапала може да се потат кога сте исплашени или возбудени.

„Бавно, длабоко вдишете, задржете го здивот неколку секунди, а потоа испуштете го, може да ви помогне да го забавите срцевиот ритам и да ве смири“, вели Абас.

Одлучете се за памучна облека

Носете широка, лесна облека и избегнувајте синтетички ткаенини, кои можат да го влошат потењето. Најлонот не „дише“ и ја задржува влагата и топлината, што ја прави поголема веројатноста да се потите.

Облеката на база на полиестер има водоотпорни својства, што значи дека не ја впива влагата – така што потта може да остане заробена на вашето тело и облеката.

Посветлите бои помагаат сонцето да се рефлектира, наместо вашата облека да го апсорбира, така што носењето бела и крем боја исто така може да ве излади.

Престаните да пушите

Ако ви требаше уште една причина за да се откажете од пушењето, ја имате.

„Никотинот му кажува на вашето тело да ја ослободи хемикалијата ацетилхолин, која ги активира потните жлезди. Исто така, ја зголемува телесната температура, отчукувањата на срцето и крвниот притисок“, вели Абас.