Светските цени на храната паднаа трет месец по ред во ноември, при што цените паднаа во речиси сите категории освен житарките, објави денес Организацијата за храна и земјоделство на Обединетите нации (FAO). Вредноста на светскиот индекс на цени на храната (FFPI) за ноември е 125,1 поен, што е намалување од 1,2 проценти во споредба со октомври и најниска вредност од јануари, според FAO.

Падот на цените на млечните производи, шеќерот, месото и растителните масла ги надмина зголемувањата на цените на житарките, покажаа најновите податоци на организацијата. Индексот на млечни производи падна петти месец по ред. Посилното снабдување со млеко во клучните региони и повисоките залихи на путер и млеко во прав во ЕУ, како и сезонското зголемување на производството во Нов Зеланд, ги намалија цените, додека послабата побарувачка во Азија влијаеше врз пазарот.

Најголем пад е забележан кај индексот на шеќер, кој се намали за 5,9 проценти на месечно ниво и за 29,9 проценти на годишно ниво, што е најниско ниво од декември 2020 година. Очекуваната обилна глобална понуда, силното производство во Бразил, добриот почеток на сезоната во Индија и поволните перспективи во Тајланд го вршеа притисокот врз цените. Индексот што ги следи цените на месото падна за 0,8 проценти на 124,6 поени, но сепак е за 4,9 проценти повисок од истиот месец минатата година.

Пониските цени на живината и свинското месо, поради изобилството на залихи и послабата побарувачка од Кина, беа компензирани од стабилните цени на говедското месо и зголемувањето на цените на овчо месо. Индексот на растително масло на ФАО падна за 2,6 проценти на петмесечно најниско ниво од 165 поени. Пониските цени на палминото, маслото од репка и сончогледовото масло го надминаа малото зголемување на цените на соиното масло.

Единственото зголемување е забележано кај индексот на цените на житарките, кој се зголеми за 1,8 проценти на месечно ниво на 105,5 поени, главно поради повисоките цени на пченицата од 2,5 проценти. Цените на пченката и јачменот исто така се зголемија, додека индексот на цените на оризот падна за 1,5 проценти на месечно ниво поради новите жетви и слабата побарувачка. Вкупната вредност на светскиот индекс на цени на храната (FFPI) за ноември е за 2,1 процент под нивото забележано во истиот месец во 2024 година, а во исто време за 21,9 проценти пониска од врвот во март 2022 година, се додава во извештајот на веб-страницата на ФАО – пренесе Политика.