Кубанскиот производител на пури „Хабанос“ објави скромен раст на приходите во 2022 година благодарение на европската побарувачка што го ублажи влијанието на пандемијата и уништувањето од ураганот Иан.

„Хабанос“ објави дека нивните приходи се зголемиле за два отсто минатата година, на 545 милиони долари. Скромниот раст го одразува континуираното влијание на пандемијата врз побарувачката и последиците од уништувањето на ураганот Иан минатиот септември во главниот производствен регион, на островот Пинар дел Рио.

Европа и понатаму е главен извор на побарувачка за кубански пури, со повеќе од половина од продажбата. По неа следат азиско-пацифичката зона со учество од 19 отсто, Америка со 15 отсто и Африка и Блискиот исток со 12 отсто, додаде Лопез.

Во Европа, продажбата се зголеми главно во Шпанија, Франција и Германија. Во Азија, Кина исто така стана важен пазар, лидер во продажбата во тој регион. Компанијата објави дека има 40 отсто удел на глобалниот пазар на премиум тутун и 80 отсто удел на пазарот на пури.

„Хабанос продолжува по патот на раст што веќе му го покажа на светот во изминатите години“, рече на прес-конференција потпретседателот за развој Хозе Марија Лопез.

Брендовите за пури „Хабанос“ како и „Кохиба“, „Монтекристо“ и „Партагас“ се продаваат во 140 земји на пет континенти, со исклучок на САД, кои воведоа економско ембарго на Куба пред повеќе од 60 години.