Европската комисија повика девет земји-членки на Шенген-зоната да започнат со постепено укинување на привремените гранични контроли што се воспоставени на нивните внатрешни граници повеќе од една година.

Тоа се Австрија, Данска, Франција, Германија, Италија, Холандија, Словенија, Шведска и Норвешка, за кои Комисијата издаде посебни мислења за оправданоста и пропорционалноста на мерките што се воспоставени повеќе од 12 месеци.

Комисијата признава дека земјите се соочуваат со безбедносни предизвици и миграциски притисоци, но нагласува дека контролите во рамките на Шенген-зоната мора да останат исклучителна и привремена мерка.

Брисел верува дека постојат поефикасни начини за решавање на безбедносните прашања без ограничување на слободното движење на луѓето.

„Постојат поефикасни алтернативи на контролата на внатрешните граници“, соопшти Комисијата.

Се наведуваат примери како што се полициски проверки базирани на ризик, мобилна биометриска идентификација и технологии за следење на возила.

Европската комисија предупреди дека контролите на внатрешните граници влијаат не само на земјата што ги воведува, туку и на соседните земји и жителите на пограничните области.

Затоа, Комисијата наведува дека е важно да се намалат негативните последици за патниците, работниците што ја преминуваат границата секојдневно, економијата и регионалната соработка.

Врз основа на спроведената анализа, Комисијата препорачува деветте земји постепено да ги укинуваат постојните контроли, а воедно да ги користат алтернативните безбедносни мерки и да ја зајакнат соработката со своите соседи.

Хена Виркунен, извршен потпретседател на Европската комисија за технолошки суверенитет, безбедност и демократија, изјави дека слободата на движење е една од фундаменталните вредности на Европската Унија.

„Шенген е едно од најголемите достигнувања на Европа. Тој симболизира слобода на движење за повеќе од 450 милиони луѓе. Нашите мислења испраќаат јасна порака: кога повторно се воведуваат контроли, тие мора да останат привремени и исклучителни“, рече Виркунен.

Шенген ги налути Балканците, Германците останаа без ќебапчиња