Кошаркарите на Црвена звезда денеска го победија Асвел во Вилербан со 106:93, во 37 коло од Евролигата. Со оваа победа, „црвено-белите“ обезбедија плеј-ин, а до каде ќе стигнат избраниците на Саша Обрадовиќ ќе видиме во следната рунда.

Српската екипа до победата ја предводеше Џаред Батлер со 24 поени, три скока и пет асистенции, а потоа следуваше Џордан Нвора со ист број поени и три скока.

Чима Монеке исто така постигна двоцифрен број поени со 15, како и Коди Милер-МекИнтајр со 14 поени, четири скока и седум асистенции.

На спротивната страна за францускиот тим прв стрелец беше Ангола со 22 поени, следен од Херисон со 16 поени (шест скока, осум асистенции).

На табелата Црвена звезда е на седмото место (21-16), додека Лион е на последното 20 место (8-29).