Евакуаиран целиот персонал од амбасадата на САД во Кабул
Нед Прајс, портпарол на Стејт департменот денеска објави безбедно окончување на евакуацијата на дипломатскиот персонал од американската амбасада во Кабул, пренесува Си-Ен-Ен .
„Потврдуваме дека безбедната евакуација на целиот персонал на амбасадата сега е завршен. Сиот персонал на амбасадата е лоциран во објакти на меѓународниот аеродром Хамод Карзаи, чиј периметар е обезбеден од војската на САД“ соопшти Прајс.
Претседателот Џо Бајден претходно одобри распоредување на дополнителни 5 илјади американски војници на аеродромот заради обезбедување на објектот среде евакуацијата на дипломатскиот персонал на САД, како и на авганистанските државјани кои бараат статус на бегалци во Вашингтон.
Во меѓувреме, вкупно 64 земји синоќа потпишаа заедничка изјава која повикува на безбедно и уредно заминување на сите што сакаат да го напуштат Авганистан по талибанската офанзива.
The United States joins dozens of countries in calling on all parties in Afghanistan to respect and facilitate the safe and orderly departure of foreign nationals and Afghans who wish to leave the country. https://t.co/DjOmg3D85v
— Ned Price (@StateDeptSpox) August 16, 2021
Помеѓу земјите потписнички на заедничката изјава, меѓу останатите се и САД, Канада, Франција, Германија и Велика Британија.
Портпаролот на талибанците, Забинулах Муџахид, вчера соопшти дека започнале да ја преземаат контролата врз Кабул и јавните згради откако владините сили го напуштија главниот град на Авганистан. По вестите за преземањето на контролата врз градот, голем број улици во Кабул останаа празни.