Европската комисија би можела да воведе нови мерки против Израел ако тој одговори на меѓународното признавање на Палестина со анексија на Западниот Брег, објави „Вашингтон пост“, повикувајќи се на висок европски функционер.

Западниот Брег, окупиран од Израел од 1967 година, е делумно под контрола на Палестинската самоуправа, но останува под израелска безбедносна контрола, со повеќе од 140 населби кои се сметаат за нелегални според меѓународното право.

Функционерот истакна дека меѓу опциите кои се разгледуваат се и ограничувања на извозот од населбите.

„Ако Израел е суров, ние ќе бидеме сурови; ако одговори благо, и ние ќе бидеме благи“, додаде тој.

Предупредувањето следи по изјавата на израелскиот премиер Бенјамин Нетанјаху дека „Палестинска држава нема да биде основана“, додека повеќе земји се подготвуваат за признавање на самитот во Њујорк, организиран од Франција и Саудиска Арабија заедно со Генералното собрание на ОН.

Во Израел, крајно десничарските министри го повикаа Нетанјаху да продолжи со анексијата. Министерот за финансии, Безалел Смотрих, го нарече тоа „единствениот одговор на антиизраелскиот чекор“, повикувајќи на прогласување суверенитет над територијата.