Авиокомпаниите „Ербас“ и „Боинг“ го ангажираа транспортниот авион „Антонов Ан-124“, еден од најголемите товарни авиони во светот, за да ја забрзаат испораката на клучни делови за производство на авиони и да ги ублажат проблемите во синџирот на снабдување што продолжуваат да ја мачат воздухопловната индустрија. Според извори запознаени со ситуацијата, Ан-124 бил користен за транспорт на делови од трупот наменети за патничкиот авион А350 на „Ербас“, како и делови од трупот за 767 на Боинг, објави Ројтерс. Тоа е скап, но брз начин на транспорт на кој производителите се обраќаат за да избегнат доцнење во производството.

Портпаролот на „Боинг“ потврди дека компанијата користи „различни начини на транспорт за одржување на стабилноста на производството“, но не сакаше да коментира за употребата на авионите „Антонов“.

„Ербас“ соопшти дека „повремено користи Антонов“, без да даде детали за конкретни летови. Според извори од индустријата, „Ербас“ во последните недели организирал воздушен превоз на големи делови од својата фабрика во Кинстон, Северна Каролина, која неодамна ја презеде од Spirit AeroSystems, за да спречи понатамошни доцнења во програмата „А350“.

„Боинг“ на сличен начин премести делови од трупот на 767 од објектот на Дахер Аероспејс во Флорида во фабриката во Еверет, Вашингтон, во јуни. Експертите велат дека ситуацијата во синџирите на снабдување постепено се подобрува во споредба со периодот веднаш по пандемијата, но предупредуваат дека остануваат сериозни тесни грла во производството на големи структури на авиони и поединечни компоненти, поради што производителите повремено прибегнуваат кон скапи воздушни транспорти за да ја одржат планираната динамика на испорака.

Боинг 737 симнат од тронот, најпродаваниот авион во светот сега е Ербас А320