Експертите предупредуваат: Кивнете ако ви се кива, инаку можете да си направите дупка во грлото
Секое воздржување од кивање може да предизвика сериозна повреда на грлото, се наведува во медицинските наоди на болницата „Најнсвил“ во шкотскиот град Данди, кои се објавени во научното списание BMJ, пишува „Гардијан“.
Кога ќе почувствувате дека ви се кива, најдобро е да го искивате. Во спротивно, би можеле да завршите со кинење дупка во грлото.
Лекарите ги советуваат луѓето да не се воздржуваат од кивање, затоа што 30-годишен маж, обидувајќи се да се воздржи од кивање, од силниот напор си го пробил сопствениот душник (трахеја) – цилиндричен орган од ‘рскавица кој овозможува транспорт на вдишениот воздух од гркланот (ларинксот) до бронхиите.
Се нагласува дека ваквите оштетувања, предизвикани од спречувањето на кивањето, можат да бидат опасни по живот. бидејќи може да доведат до задушување, а во ретки случаи и до пукање на мозочните капилари и крвавење.
Се наведува дека ваквите повреди не се вообичаени, но дека може да настанат, особено кога кивавицата се задржува во неколку последователни наврати.
Лекарите од болницата „Најнсвил“ советуваат слободно и без ограничување да кивате, бидејќи тоа е природен начин на телото да ги исфрли надразнувачите од носните (назалните) канали.