Во нашата група „А“ на Европското првенство во Унгарија и Словачка, во рамките од првото коло Данска убедливо со 30:21 славеше над Црна Гора.

Во истата група најдобрата македонска репрезентација загуби во балканското дерби од селекцијата на Словенија.

Второто коло е закажано за в сабота (15 јануари), од 18.00 часот во унгарскиот град Дебрецин силите ќе ги одмерат Црна Гора и Македонија.

Поранешниот член на Вардар 1961, Васко Шеваљевиќ после поразот од Данците изјави дека е горд на своите репрезентативни колеги.

– Горд сум на овие момци, на тоа како се бореа против велесила каква што е Данска. Ги оправдаа очекувата и драго ми е што сите добија шанса. Само вака треба да продолжат. Што се однесува до следниот дуел со Македонците, го гледавме нивниот меч против Словенија.

И со двете репрезентации можеме да играме. Добро се држеа, но ние имаме што да бараме против нив и одиме на победа. Но, никогаш не се знае што ќе биде, што ќе донесе новото тестирање на коронавирус – рече Шеваљевиќ за црногорските медиуми.