Едвард Нортон, човекот кој важи за еден од најталентираните актери на својата генерација со култни улоги во „Боречки клуб“ и „Американска историја Икс“, конечно го откри својот идол. Иако Нортон е познат по соработката со најголемите современи режисери, неговото срце му припаѓа на еден актер од златното доба на Холивуд, легендарниот Џејмс Џими Стјуарт, пишува „Фар аут магазин“.

Нортон призна дека токму восхитот кон Стјуарт му помогнал да донесе тешка одлука во кариерата кога се двоумел дали да прифати улога во празничен студиски филм.

„Тој е мојот омилен актер“

Зборувајќи за својата мотивација, Нортон истакна дека Стјуарт поседувал ретка способност да се движи низ филмските кадри со леснотија на танчар, без разлика дали станува збор за брзи и духовити дијалози или за длабоки, емотивни драми.

„Од сите актери од таа ера, тој ми е омилен. Имаше способност да биде брилијантен во духовитите сцени, но кога приказната ќе станеше сериозна, тој имаше неверојатна тежина и влијание врз публиката“, изјави Нортон.

Инспирација од култниот „Прекрасен живот“

Како пресуден момент за неговата почит кон Стјуарт, Нортон го наведе филмскиот класик од 1946 година, „Прекрасен живот“ (It’s a Wonderful Life). Во овој филм, Стјуарт мајсторски ги спои мрачните теми како економскиот крах и очајот со пораките за семејството и искупувањето.

Џејмс Стјуарт во текот на својата богата кариера беше номиниран за Оскар пет пати, а освои два. Покрај соработката со Алфред Хичкок во култните трилери „Вертиго“ и „Прозорец во дворот“, тој остана запаметен како актер кој можеше да одигра сè, од вестерни до софистицирани комедии.

За Нортон, токму таа способност да се допре до душата на гледачот го прави Стјуарт најголемиот актер на сите времиња.