Албанскиот премиер Еди Рама во четвртокот одржа средба со папата Лав 14. На средбата, Рама беше придружуван од сопругата Линда Рама и од синот, објави „Јуроњуз Албанија“.

Потоа се одржала и средба во Државниот секретаријат на Светата столица со кардиналот Пјетро Паролин и надбискупот Пол Ричард Галагер.

„Во срдечните разговори беше истакната добрата постоечка соработка меѓу Светата столица и Република Албанија, а беа отворени и теми од заемен интерес, особено оние што се однесуваат на односите меѓу црковната заедница и граѓанското општество“, соопшти прес-службата на Светата Столица.

Меѓу централните теми на разговорите биле и клучни регионални прашања, вклучително и состојбата во земјите од Западен Балкан и патот на Албанија кон целосна интеграција во Европската Унија.