Жариштето на ебола во Демократска Република Конго и Уганда најверојатно се ширело со недели пред здравствените власти официјално да го откријат, пишува „Гардијан“.

Најраниот познат сомнителен случај бил 59-годишен маж кој развил симптоми на 24 април и починал три дена подоцна.

Здравствените власти биле алармирани дури на 5 мај, откако информации за можните случаи се појавиле на социјалните мрежи. До тој момент, според Африканскиот центар за контрола и превенција на болести, веќе починале околу 50 лица.

Светската здравствена организација (СЗО) потоа прогласи јавно-здравствена вонредна состојба од меѓународно значење и повика на засилени мерки за спречување на ширењето.

Досега се регистрирани 246 сомнителни случаи и 88 смртни случаи. Случаите прво се појавиле во провинцијата Итури, во источниот дел на Демократска Република Конго, но потврдени се и во соседна Уганда.

Експертите предупредуваат дека доцното откривање му дало време на вирусот да се прошири, што го отежнува следењето на контактите и изолацијата на заразените.

Дополнителен проблем е што станува збор за редок сој на ебола наречен Бундибуџо, за кој нема одобрена вакцина. Постоечката вакцина против ебола не е соодветна за овој тип вирус.

Еболата е опасна и често смртоносна болест која се пренесува преку телесни течности. Симптомите вклучуваат треска, замор, болки во мускулите, повраќање, дијареја и крварење.

Контролата на ширењето дополнително ја отежнува конфликтот во источниот дел на Конго, каде здравствените установи и претходно биле цел на напади.

СЗО предупредува дека вистинскиот број на заразени и географското ширење на заразата сè уште не се јасни, па постои можност бројките да бидат поголеми од официјално регистрираните.

Епидемија на ебола го погоди Конго — 65 луѓе го загубија животот, 246 случаи се сомнителни