Сопругата на Вил Смит, Џејда Пинкет Смит, проговори за инцидентот на Оскарите и за првпат јавно призна низ што поминува нејзиното семејство оттогаш.

Кон крајот на март, актерот Вил Смит го направи најголемиот гаф во својата 30-годишна кариера. Тој излезе на сцената за време на доделувањето на Оскарите и испровоциран од шегата на сметка на неговата сопруга Џејда Пинкет Смит, му удри шамар на комичарот Крис Рок.

Иако неколку минути подоцна освои Оскар за неговата главна улога во филмот „King Richard“, во следните денови неговиот чин на насилство беше осуден од Американската филмска академија со забрана на присуство на Оскарите во следните десет години, а многу продукциски куќи и филмски студија ја прекинаа соработката со 53-годишниот Смит.

Актерот јавно му се извини на Крис Рок, кој за среќа не поднел тужба против него, а сега медиумскиот молк го прекина Џејда Пинкет Смит.

Сопругата на Вил, непосредно пред емитувањето на првата епизода од нејзиното ток-шоу „Red Table Talk“, напишала изјава во која бара разбирање.

„Ве молам земете го предвид сето она што се случи во последните недели и разберете дека семејството Смит минува низ тежок период и ние сè уште се обидуваме да се стабилизираме. Ќе споделиме дел од овој процес на нашето исцелување со вас, но кога ќе дојде време за тоа. Дотогаш, ве молиме за разбирање, а оваа емисија ќе нуди содржини за силни и инспиративни гости“, се вели во изјавата на г-ѓа Смит.