Министерството за одбрана на Хрватска нема да ги гони хрватските државјани на возраст од 19 години кои живеат во Босна и Херцеговина доколку не ја отслужат воената служба во Хрватска, бидејќи законите во Босна и Херцеговина тоа не го дозволуваат, објави Национал.хр.

Заменик министерот за одбрана на Босна и Херцеговина, Славен Галиќ, претходно денеска на социјалната платформа X предупреди дека младите мажи од Босна и Херцеговина, кои имаат и хрватско државјанство, би можеле да бидат санкционирани доколку мора да отслужат воена служба во Хрватска и повика на итно решавање на проблемот.

Хрватското Министерство за одбрана потоа ја отфрли можноста за санкции од хрватска страна.

„Кога станува збор за 19-годишни млади мажи кои имаат регистрирано живеалиште во Босна и Херцеговина и имаат двојно државјанство, хрватско и босанско-херцеговско, Министерството за одбрана нема да ги подложи тие хрватски државјани на кривично гонење, бидејќи законите во Босна и Херцеговина забрануваат воена обука во странски вооружени сили“, објави денеска Министерството за одбрана.

Галиќ рече дека Законот за одбрана на Босна и Херцеговина им забранува на граѓаните на таа земја да учествуваат во вооружените сили на други земји.

Министерството за одбрана појасни дека според договорот меѓу двете земји за двојно државјанство, „двојниот државјанин ја извршува својата воена служба или друга задолжителна служба во договорната страна каде што живее“.

Според министерството, двојните државјани кои ја завршиле својата воена служба или цивилна служба во едната од двете земји ќе бидат признати во другата.

Според Законот за одбрана на Република Хрватска, сите граѓани на Хрватска се должни да служат во војската, додека Законот за одбрана на Босна и Херцеговина забранува ангажирање на граѓани на Босна и Херцеговина во воените сили на други земји. Постои дури и можност за одземање на државјанството во случај на непочитување на овој закон.

Во Хрватска, воената служба треба да започне на почетокот на следната година.