Латвија денеска соопшти дека открила најмалку еден дрон што летал во воздушниот простор на земјата и дека биле активирани борбени авиони на НАТО за справување со заканата. Ова е најновиот во серијата безбедносни инциденти од ваков тип во балтичкиот регион, објави „Ројтерс“.

Латвиските вооружени сили подоцна соопштија дека заканата е завршена, без да дадат повеќе детали.

Украина во последните месеци ги засили нападите со дронови со долг дострел врз Русија, вклучително и во подрачјето на Балтичкото Море, каде што неколку украински воени дронови залутале во воздушниот простор на членките на НАТО — Финска, Латвија, Литванија и Естонија.

Киев се извини за навлегувањата и ја обвини руската попречувачка активност врз навигациските сигнали за тоа што нејзините дронови биле пренасочени преку границите. Москва тврди дека Украина го користи воздушниот простор на НАТО како заштита за своите напади врз Русија, што Киев, НАТО и балтичките држави категорично го негираат.

Авион на НАТО собори украински дрон над Естонија, Киев се извинува

„Сè додека продолжува руската агресија врз Украина, постои можност да се повторуваат инциденти во кои странски беспилотни летала влегуваат или се приближуваат до латвискиот воздушен простор“, напишаа претставници на латвиската армија на социјалната мрежа „Икс“.

Еден дрон било потврдено дека влегол во Латвија од Белорусија, изјави воен портпарол за латвиската телевизија.

Латвиската влада минатата недела поднесе оставка поради начинот на кој се справувала со овие навлегувања, а во тек се разговори за именување нов кабинет.

Вооружените сили во соопштение денеска ги предупредија жителите во источна Латвија, која граничи со Русија и со Белорусија, да побараат засолниште во затворен простор додека инцидентот сè уште траеше.

ВИДЕО | Руски дронови се урнаа во Латвија — издадено е предупредување за опасност

Балтичките земји ја обвинуваат Москва

Во вторникот борбен авион на НАТО собори сомнителен украински дрон над соседна Естонија, додека слично нарушување на воздушниот простор во Литванија вчера го запре воздушниот сообраќај кон главниот град и ги принуди пратениците да се засолнат под земја.

— Тие, Украина, сигурно не сакаат нивните дронови да завршуваат на пријателска територија, од очигледни причини. Понекогаш станува збор за попречување на сигналите. Понекогаш станува збор за други нарушувања — рече денеска шведскиот премиер Улф Кристерсон на заедничка прес-конференција со генералниот секретар на НАТО, Марк Руте.

Балтичките држави, кои се силни поддржувачи на Украина, за инцидентите ја обвинија Москва, тврдејќи дека таа ги пренасочува украинските дронови од нивните планирани цели во Русија, без да приложат докази. Кремљ вчера соопшти дека ја следи ситуацијата.

Полскиот министер за одбрана денеска изјави дека Украина мора да биде многу прецизна при користењето дронови за да не ѝ даде можност на Русија да се вмеша во нивната траекторија на лет.

Претседателката на Европската комисија, Урсула фон дер Лајен, вчера изјави дека руските закани кон балтичките земји се „неприфатливи“ и дека ќе се сметаат за закани кон целата Европска Унија.

Страв во Литванија поради дронови кај границата со Белорусија — жителите добија повик да се засолнат, претседателот и премиерката беа евакуирани