Несекојдневен инцидент се случил на 30 септември. На редовниот лет на Кроација ерлајнс ОУ486 од Загреб за Стокхолм, куче го оштетило просторот за багаж на Ербас А319 (рег. 9A-ЦТЛ), пренесува „АвиоРадар“.

Како што наведуваат, кучето согласно регулативата се наоѓало во багажниот простор, а набрзо по качувањето се ослободило од својот кафез. Во текот на полетувањето, екипажот слушнал бучава и трчање на куче во багажниот простор, па авионот бил вратен, а патниците биле симнати и префрлени во друг авион. По увидот на штетата предизвикана од кучето во багажниот простор, превозникот одлучил авионот превентивно да го повлече од употреба и да го упати на технички преглед за да се заменат оштетените делови.

– Во тек е утврдувањето на деталите и околностите. Засега може да се потврди дека компанијата во подготовката на превозот на кучето на летот ОУ486 Загреб – Стокхолм ги почитувала хрватските и меѓународните законски прописи и соодветната внатрешна процедура за транспорт на животни во авионот. Поради одредени оштетувања во багажниот простор на авионот планиран за летот ОУ486, донесена е одлука авионот превентивно да се повлече од сообраќајот и да се испрати на технички преглед, а патниците од наведениот лет се превезени до нивната крајна дестинација истата вечер со нашиот заменски авион – соопштиле „Кроација ерлајнс“.