Американски доставувач на апарати вчера бил осуден на доживотен затвор затоа што претепал 75-годишна жена до смрт и ја запалил во нејзиниот дом на Флорида. Судија на округот Палм Бич го осуди Хорхе Дупре Лахаз на две доживотни затворски казни, плус уште 30 години затвор. Во јануари, 24-годишникот бил осуден за убиство од прв степен, кражба и подметнување пожар, пишува „Ен-Би-Си“.

Дупре Лахаз и уште еден маж испорачале машина за перење и сушење во Бока Ратон во август 2019 година. Откако ги поставил уредите, другиот човек излегол надвор и неколку минути подоцна слушнал врисоци. Тогаш ја нашол жената на подот и се јавил на 911. Дупре Лахаз се оддалечил со камионот, но подоцна бил запрен од полицијата.

На местото на злосторството, инспекторите пронајшле гумен чекан и конзерва со разредувач што Дупре Лахаз ги користел за да ја запали жртвата. На двата предмети имало негови отпечатоци. Полицијата, исто така, открила дека некој пребарувал низ паричникот на жртвата, што укажува дека кражбата била мотивот зад нападот.

Адвокатите на Дупре Лахаз за време на судењето не негираа дека 24-годишникот ја нападнал постарата жена, но тврдеа дека не се работи за убиство со умисла.