Американскиот претседател Доналд Трамп објави договори насочени кон намалување на цената на популарните лекови за слабеење. По разговорот со раководителите на фармацевтски компании во Белата куќа, Трамп откри договори со Eli Lilly и Novo Nordisk. Потрошувачите ќе плаќаат помеѓу 245 и 350 долари месечно за лекови за дебелина, вклучувајќи ги Wegovy и Zepbound.

Многу лекови GLP-1, кои се користат за лекување на дијабетес и дебелина, чинат повеќе од 1.000 долари месечно за оние без здравствено осигурување. Договорите ќе го прошират пристапот до програмите на „Ели Лили“ и „Ново Нордиск“ во рамките на системите „Медикер“ и „Медикејд“ – владините планови за јавно здравствено осигурување наменети за постари лица и Американци со ниски приходи. Се проценува дека 10 проценти од корисниците на „Медикер“ ќе имаат право на продолжен пристап до лекови GLP-1 и ќе платат само 50 долари, пишува Би-Би-Си. Официјалните лица изјавија дека оние кои се запишани во „Медикејд“ ќе добијат датум на почеток кој ќе зависи од тоа кога државите ќе аплицираат за учество.

Трамп долго време се залага за политиките на „најповластена нација“ – стратегија насочена кон усогласување на цените на лековите во САД со пониските цени во странство. Лековите за слабеење ќе се продаваат по намалени цени директно на потрошувачите преку „ТрампРкс“, владина веб-страница која ќе биде лансирана до јануари. „Фајзер“ беше првиот голем производител на лекови што склучи договор со Трамп, намалувајќи ги цените на некои лекови за до 85 проценти на веб-страницата „ТрампРкс“. „Фајзер“ исто така се согласи да ги намали цените на лековите што се издаваат на рецепт за „Медикејд“- пишува Телеграф.

„АстраЗенека“ и „ЕМД Сероно“ исто така постигнаа спогодби со администрацијата во последните недели.