Селекторот на ракометната репрезентација на Данска, Николај Јакобсен, вели дека само еден позитивен на коронавирус може да предизвика хаос и да ги уништи амбициите на данската репрезентација на Европското првенство о Унгарија и Словачка кое започнува за осум дена.

– Сите сме внимателни кога станува збор за коронавирусот бидејќи е многу заразен. Доволно е да се зарази едно лице и ЕП да заврши уште пред да започне – изјави Јакобсен.

Голманот на Магдебург, Јаник Грин, е позитивен на коронавирус, но селекторот Јакобсен засега нема намера да повика дополнителна замена иако е свесен дека нема да може да смета на одличниот голман за првата фаза од ЕП.
– Засега нема да повикам замена, имаме двајца голмани. Не сакам сега да повикувам голман кој извесен период не поминал со нас на подготовките – вели Јакобсен.

Данска е дел од групата А на ЕП во која сè уште и Македонија, Словенија и Црна Гора.

Короната не им прави проблеми само на Данците, денеска е потврдено дека уште четворица српски репрезентативци се позитивни.
Ракометната федерација на Србија објави дека на последната рунда тестирања, позитивни се Стеван Сретеновиќ, Илија Абутовиќ, Драган Пешмалбек и Немања Зеленовиќ. Вчера пак позитивни беа Владимир Цупара, Богдан Радивојевиќ како и селекторот Тони Џерона и тренерот на голманите Димитрије Пејановиќ и физиотерапевтот и шефот на делегацијата.