Со крајот на април, социјалните мрежи повторно се преплавија со едно од најпознатите интернет мемиња – „It’s gonna be May“ (во превод: Ќе биде мај), кое традиционално се појавува во пресрет на мај и секоја година станува вирално.

Во центарот на оваа шега е Џастин Тимберлејк, чиј специфичен изговор во песната „It’s Gonna Be Me“ (во превод: Ќе бидам јас) ја создаде основата за мемето. Во рефренот, зборот „me“ (во превод: јас) звучи како „May“ (во превод: мај), што интернет-корисниците го претворија во сезонска шега поврзана со доаѓањето на новиот месец.

Според „И њуз“, првата верзија на мемето се појавила на платформата Тамблр во 2012 година. Станувало збор за календар со фотографија од Тимберлејк на 30 април, над која стоел натписот „It’s gonna be May“. Оттогаш, различни варијации секоја година кружат на интернет и стануваат дел од дигиталната култура.

Популарноста на мемето ја препозна и самиот Тимберлејк, кој во 2020 година, за време на пандемијата со ковид-19, објави своја верзија на платформата Икс (поранешен Твитер), на која неговото лице е прекриено со заштитна маска.

Spring Summer 2020. Thanks for this, Internet. pic.twitter.com/I3mdWPTjiN

— Justin Timberlake (@jtimberlake) May 1, 2020

Во интервју за јутјуб-шоуто „Хот уанс“ во 2023 година, пејачот објасни дека оригинално го отпеал стихот „It’s gonna be me“, но по сугестија на продуцент, изговорот бил променет.

Неговиот колега од групата „Енсинк“, Џеј Си Чејзез, посочил дека авторите на песната – Макс Мартин, Андреас Карлсон и Рами Јакуб – биле Швеѓани, па нивниот акцент влијаел врз финалниот изговор.

„Она што е интересно кај Макс Мартин е што нивниот ‘несовршен’ англиски ги правеше поуспешни автори. Ги редеа зборовите на начин што можеби не звучеше логично, но кога ќе се отпее – станува многу попримамливо и лесно се памети“, изјави Тимберлејк.

Тој низ шега додаде дека токму таа специфична интерпретација придонела песната да стане култен хит.