Во една од најсилните кошаркарски лиги, шпанската АЦБ, минатата недела за екипата на Мурсија дебитираше младиот од Англија со историско презиме, 18-годишниот Ноа Черчил Соренсен.
Поранешниот британски премиер и една од најзначајните личности во 20. век Винстон Черчил е неговиот дедо.
– Моето презиме е прво што се споменува во секој разговор, а многумина мислат дека се шегувам кога се претставувам. Не можат да поверуват дека сум внук на Винстон Черчил – изјави младиот Ноа по дебито за Мурсија.

Тој на дресот не го носи презимето на својот славен дедо, туку пишува Соренсен. Ноа Черчил Соренсен е роден во Данска, и неговото семејство нема допирни точки со политиката.
– Сакав на мојот дрес да пишува Черчил, но делегатите го ставија второто презиме и така остана. Татко ми е електричар, додека единствената врска на мајка ми со политиката е презимето. Ние сме многу обични луѓе – додава Ноа Черчил.

Интересно е што неговиот славен дедо не му е идол, туку тоа е легендарниот Мајкл Џордан.
– Тој е најблиску до идолот што некогаш сум го имал. Но, повеќе сакам да играм отколку да ги гледам другите како играат. Добар шутер сум, знам да креирам за соиграчите – вели младиот кошаркар.