Победата на кошаркарите на МЗТ Скопје во големото куп финале против МКК Куманово, го означи освојувањето на 11 трофеј за легендарниот кошаркар во ова натпреварување, Дамјан Стојановски.

Иако одамна е најтрофеен играч во македонската клупска кошарка, играчот на МЗТ по завршувањето на финалниот натпревар од турнирот во Куманово е апсолутен рекордер во Купот на Македонија.

Со тоа, тој се оддели од уште еден легендарен кошаркар, Перо Блажевски кој својата играчка кариера ја заврши со 10 пехари.

Инаку, оваа сезона Стојановски ќе има можност да стане апсолутен рекордер и во македонското првенство.

Во моментов е на делба на првото место со 10 трофеи, заедно со својот брат Огнен Стојановски и со Марјан Ѓуров. И со евентуален пехар со МЗТ во првенството, ќе избие сам на првата позиција со што ќе испише нова страница во македонската клупска кошарка.