Селекторот на хрватската фудбалска репрезентација, Златко Далиќ, пред вечерашниот натпревар против Гана, изјави дека неговиот тим не ги одиграл игрите на кои јавноста е навикната досега на Светското првенство, но верува дека претстојниот меч е можност за пробив.

Хрватска ќе игра против Гана во Филаделфија од 23.00 часот во последното коло од групата Л, а крајниот исход би можел да одлучи кој ќе се пласира во нокаут фазата.

– Не бевме на нашето ниво и натпреварот против Гана е можност да го промениме тоа. Се соочуваме со натпревар против квалитетен противник кој веќе го обезбеди продолжението на натпреварувањето. Тие се опасни во транзицијата и сè уште не примиле гол, па затоа мора да бидеме многу подобри отколку во претходните два натпревари – рече Далиќ.

Хрватскиот селектор верува дека неговиот тим мора да ја подобри својата игра во двата правци, особено кога станува збор за концентрацијата во одбраната и задржување на топката.

– Мораме да бидеме поодговорни во одбраната и не смееме толку лесно да ја изгубиме топката. Протокот на топката мора да биде побрз, досега бевме премногу бавни во тоа. Изгледаме подобро на тренинзите отколку на натпреварите и сега е време да го пренесеме тоа на теренот – вели Далиќ.

Тој додаде дека неговиот тим нема да биде оптоварен со резултатите на другите тимови, и покрај фактот дека исходот од групата зависи и од вториот натпревар.

– Победата против Панама ни даде дополнителна самодоверба, но некои резултати не ни одеа во прилог. Сепак, не сакаме да ги гледаме другите. Нашиот фокус мора да биде исклучиво на нашата игра и на тоа сами да се избориме за пласман – се зборовите на Далиќ.

Во вториот натпревар од Групата Л, Англија и Панама исто така се среќаваат од 23.00 часот. Англија и Гана имаат по четири бода, Хрватска е трета со три, додека Панама нема бодови по две одиграни кола.