ЦЈЗ Куманово ги врати на работа двајцата микробиолози што се пензионираа и сега издава законски резултати од лабораторија
Центарот за јавно здравје Куманово ги врати на работа двајцата пензионирани микробиолози, па така сега има дозвола да пружа здравствени услуги во микробиолошката лабораторија, потврдуваат за „Слободен печат“ од Државниот здравствен и санитарен инспекторат. Претходната недела во нашата редакција пристигнаа голем број на резултати од пациенти, на кои е евидентно дека не е потпишан микробиолог, а ДСЗИ на 16 август имаше издадено забрана на оваа лабораторија да работи зашто немаше носител на дејност односно немаше вработен микробиолог кој е неопходен и законски услов за да било кој резултат биде издаден.
„Извршен е контролен надзор на 29 август 2023 година при што е констатирано дека во установата на ден 25.08.2023 год. се пријавени двајца специјалисти по микробиологија и паразитологија на неопределено работно време со полно работно време со уредни лиценци за работа. Пријавените специјалисти се од редовите на лицата кои заминале во пензија и за кои установата имаше поднесено барање до Министерството за здраство за продолжување на работниот однос согласно Законот за здравствена заштита. Согласноста од Министерството за здравство е добиена на ден 24.08.2023 година. Со тоа е констатирано дека установата постапила по издаденото решение и обезбедила двајца специјалисти од соодветната област“, велат од Инспекторатот.