Поранешениот директор на Агенцијата за разузнавање и министер за внатрешни работи, Наќе Чулев, објави дека по повеќегодишна битка, судот донел пресуда во негова корист, а според која незаконски му бил одземен безбедносниот сертификат и незаконски бил отпуштен од работа. Чулев вели дека со години бил цел на организирана кампања на дезинформации и политички прогон од претходната власт.

„Судовите утврдија дека целата конструкција била неправична и политички мотивирана, а против сторителите е поднесена кривична пријава за злоупотреба на институциите, за која очекувам институциите да постапат, а сторителите да одговараат“ напиша Чулев на Фејсбук.

Во објавата Чулев пишува за годините „на понижување, клевети и неправда“, што ги поминал во својата професионална кариера, во кои, како што вели, бил цел на организирана кампања на дезинформации и политички прогон од претходната власт.

„Тоа беа години на јавно понижување и дискредитација, медиумски конструкции и лажни наративи, како и силен притисок врз моето семејство и моите деца. Човек кој речиси 25 години чесно служел во безбедноста на државата и соработувал со меѓународни партнери, одеднаш беше прогласен за „безбедносен ризик“ – не поради дело, туку поради политичка одлука и затоа што јавно зборував за корупцијата и аномалиите во системот“ додава тој.

Чулев вели дека оваа објавата не ја пишува заради одмазда, ниту за саморекламирање, „туку за вистината да биде јавно запишана“.

Агенција за разузнавање: Чулев нема добиено отказ, туку е суспендиран по решение на Дирекцијата за безбедност на класифицирани информации