Тренерот на Манчестер сити, Пеп Гвардиола, понуди необично објаснување за веќе традиционално подобрата игра на неговиот тим во завршницата од сезоната. По убедливата победа над Челси, каталонскиот стратег откри што стои зад формата на „граѓаните“ токму кога се решава шампионската трка, пред клучниот дуел со лидерот Арсенал.

Манчестер сити е препознатлив по доминантните финиши, а триумфот од 3-0 против Челси најавува дека повторно можеби да гледаме такво сценарио. На прашањето зошто неговите екипи секогаш „експлодираат“ напролет, Гвардиола даде неочекуван одговор.

„Сонцето. Не се шегувам, да, сонцето е причината. Во Манчестер речиси и да го нема. Искрено, расположението е подобро, а со тоа и менталитетот на целата група“, изјави менаџерот.

Статистиката оди во прилог на неговата теорија, откако го презеде клубот во 2016 година, Сити во април има дури 29 победи на 32 натпревари во Премиер лигата. Освен временските услови, Пеп заслугите ги припиша и на културата во клубот.

„Хиерархијата ни донесе менталитет на извонредни играчи. Тоа е клучот за успехот“, потенцираше тој.

И покрај одличната форма, Гвардиола улогата на фаворит за титулата му ја препушти на Арсенал, кој има шест бода предност на табелата, иако Сити има натпревар помалку и веќе ги совлада „топчиите“ во финалето на Карабао купот.

„Одигравме три добри натпревари, но најдобар тим во Англија е Арсенал. Бројките го потврдуваат тоа“, рече Гвардиола по победата на „Стемфорд Бриџ“.

„Ќе се подготвиме максимално оваа недела и ќе се адаптираме според искуството од финалето. Начинот на игра е она што ги дефинира тимовите, ако не напредувате како екипа, нема да победувате.“

ВИДЕО | Манчестер сити убедливо го совлада Челси и се доближи до Арсенал во трката за титулата