Дејан Илиев, човекот што на 2 февруари ги открил телата во планинарскиот дом „Петрoхан“ и потоа ја известил полицијата, ја напуштил Бугарија, објави „Новините“.

Илиев ги пронашол телата на 49-годишниот Ивајло Иванов, 45-годишниот Дечо Илиев и 51-годишниот Пламен Статев и формално го пријавил случајот во Министерството за внатрешни работи, по што неколку дена подоцна ја напуштил земјата.

Загриженоста за тоа каде се наоѓа Илиев јавно ја изрази мајката на Николај Златков, Ралица Асенова, чиј син на 8 февруари беше пронајден мртов под врвот Околчица заедно со Ивајло Калушев и со 15-годишниот Александар Макулев. Таа изјави дека Илиев ѝ јавил за смртните случаи во домот „Петрoхан“, но не спомнал дека жртвите имале прострелни рани и изрази сериозна загриженост бидејќи не можела да стапи во контакт ниту со Илиев ниту со неговата партнерка.

Илиев заминал за Мексико

Подоцна стана јасно дека Илиев, познат по прекарот „Мексиканецот“, минатата недела заминал за Мексико. Бидејќи нема директни летови од Бугарија, тој првин отпатувал за Шпанија. Неговата крајна дестинација е поврзана со приватниот живот бидејќи живее со Мексиканка по име Лола. Двајцата претходно живееле заедно во куќа во селото Гинци, кое се наоѓа во близина на базата на планинските чувари и најблиску до домот „Петрoхан“.

Еден ден пред да ги открие телата, Илиев добил порака од Ивајло Калушев со содржина: „Збогум, пријателе, многу сме уморни и веќе немаме сила.“

Оваа информација Илиев ја пренел до Министерството за внатрешни работи. Тој бил испрашуван двапати и соработувал со истражителите пред да ја напушти земјата.

Морничави детали за случајот „Петрохан“: Од Мексико до Бугарија, „Патот на Бодисатвата“ е поплочен со педофилија?

Како „Мексиканецот“ влегол во кругот на Калушев?

Илиев станал дел од најтесниот круг на Ивајло Калушев уште кога имал 16 години. Подоцна учествувал во патувања со брод кон Мексико, што го потврди Валери Андреев, кој изјави дека имал сексуални односи со Калушев додека бил малолетен.

Во последните години, сепак, Илиев очигледно се дистанцирал од најиницираните членови на групата поврзана со т.н. култ на Лама Иво, најверојатно поради врската со својата мексиканска партнерка.

Постојат податоци за активностите на Илиев во Мексико до 2024 година, кога изнајмил куќа во регионот на Тулум. Во 2025 година купил имот во селото Гинци, во близина на домот „Петрoхан“. Внимание привлекува и неговото семејно потекло.

Неговиот татко, Делчо Данаилов Илиев, бил регрутиран како агент на контраразузнавањето во 1987 година, според податоци на Комисијата за досиеја. Тој служел во истиот оддел во кој подоцна бил префрлен и Георги Калушев, таткото на Ивајло Калушев.

Полицијата влегла во имотот на Калушев

Во меѓувреме, истражителите ја засилија работата поврзана со Ивајло Калушев. Екипи на Криминалистичката полиција ја пребаруваат куќата на Калушев во селото Буглари. Полицијата влегла во имотот за првпат, откако претходно го имала разгледувано само однадвор. Акцијата е насочена кон пронаоѓање документи, а се очекува да бидат одземени и уреди со снимки од видеонадзор – според информации, на имотот имало речиси десет камери.

Телата пронајдени на 2 февруари во домот „Петрoхан“, една недела подоцна беа надополнети со уште едно морничаво откритие. Под врвот Околчица, истражителите пронајдоа уште три тела во напуштен кампер: 51-годишниот Ивајло Калушев, 22-годишниот Николај Златков и 15-годишниот Александар Макулев.

Истрагата утврдила дека меѓу 27 и 31 јануари тројцата престојувале во селото Буглари, по што се упатиле кон Врачанскиот Балкан.

Жителите на Буглари изјавиле дека непосредно пред заминувањето, Калушев, Златков и тинејџерот поправале чешма во дворот на имотот. Нивното заминување било нагло. Подоцна била повикана специјализирана екипа бравари за да помогне при отворањето на куќата.

Имотот во Буглари бил купен од Ивајло Калушев во 2022 година и служел како база на неговата организација во близина на морето. Соседите изјавиле дека претходниот сопственик бил Русин. Проверка во Имотниот регистар покажува дека Калушев со текот на годините стекнал вкупно 21 имот низ Бугарија преку купување, донации и преку наследство.

Неговиот најголем имот бил самиот дом „Петрoхан“, во чија близина во 2021 година купил и околу пет декари земјиште од Министерството за земјоделство за 4.918 лева, односно околу 2.514 евра.

Надвор од Бугарија, Калушев поседувал и недвижности во Мексико.

Бугарин кој исчезнал пред 10 години е пронајден на планината Пирин, велат дека се криел од лихвари