Пред споменикот на Св. Климент Охридски во дворот на Националната и универзитетска библиотека „Св. Климент Охридски“ денес ќе бидат положени венци и цвеќе по повод државниот празник посветен на големиот светител.

На чествувањето ќе присуствуваат делегации од Кабинетот на Претседателот, Собранието, Владата, Генералштабот на Армијата, МПЦ-ОА, како и претставници на институции, дипломатскиот кор и политички партии.

Во рамки на одбележувањето, во Собранието традиционално ќе биде доделена и државната награда „Св. Климент Охридски“ за 2025 година – највисокото национално признание за долгогодишни исклучителни остварувања во воспитанието, образованието, културата, уметноста, здравството, заштитата на животната средина и социјалната дејност од јавен интерес.

Добитници на годинашната награда се академик Витомир Митевски за достигнувања во областа на воспитанието и образованието, како и композиторот Живоин Глишиќ и ликовниот уметник Беди Ибрахим за придонесот во културата и уметноста.