Често стои во кујната како обичен украс, но покрај својата убавина, важно е да се знае дека оваа билка има изненадувачки силно дејство врз исхраната и здравјето. Според податоци на „Веб ем-ди“, магдоносот е богат со витамини, минерали и антиоксиданси. Само една лажица магдонос обезбедува повеќе од 70 проценти од препорачаниот дневен внес на витамин К. Дополнително, магдоносот е значаен извор на апигенин – флавоноид познат по своите потенцијални антитуморски својства, пишува „Живим“.

Здравствени придобивки

Магдоносот е одличен избор за подобрување на варењето и намалување на надуеноста. Бројните соединенија во оваа билка помагаат во исфрлање на гасовите од организмот, па по оброкот се чувствувате полесно. Магдоносот го штити желудникот со тоа што ја намалува воспаленоста и спречува оштетувања предизвикани од стрес. Неговите антиоксиданси се борат со штетните молекули кои можат да го иритираат дигестивниот систем.

Тој е и добар извор на растителни влакна – половина чаша содржи повеќе од еден грам, што помага при надуеност и запек.

Магдоносот може да биде корисен и како природен диуретик. Според студија од 2002 година, екстрактот од семе од магдонос го зголемува излачувањето на урина, веројатно со влијание врз начинот на кој бубрезите ги обработуваат натриумот и калиумот. Во суштина, магдоносот помага телото да задржи повеќе калиум во бубрежните канали, што повлекува дополнителна вода во урината и го поттикнува исфрлањето течности.

Неговите силни антиоксидативни својства можат да бидат значајни и во борбата против ракот. Студија од 2015 година открила дека екстрактите од листовите и стеблата на магдоносот можат да ги штитат здравите клетки од оштетување на ДНК и да ја забават миграцијата на одредени клетки на рак на дојка. Ова укажува на потенцијална улога во превенцијата од рак и намалување на ризикот од метастази.

Општо земено, магдоносот е корисна намирница која помага во борба против оксидативниот стрес и може значително да го подобри целокупното здравје.

Мерки на претпазливост

Иако има бројни здравствени придобивки, прекумерната консумација може да доведе до несакани ефекти. Магдоносот може да ја намали концентрацијата на шеќер во крвта, што кај некои лица може да предизвика хипогликемија. Во големи количини – особено кога се консумира како концентриран екстракт или масло – може да биде и токсичен за црниот дроб.

За бремените жени е потребно дополнително внимание. Според податоци на „Хелтлајн“, две соединенија во магдоносот – миристицин и апиол – можат да предизвикаат контракции на матката доколку се внесат во големи количини. Во потешки случаи, тоа може дури и да доведе до спонтан абортус.

Миристицинот може да стигне и до плацентата и да влијае врз срцевиот ритам на бебето. Маслото од магдонос, пак, во одредени ситуации може да предизвика напади или оштетување на бубрезите. Големи количини масло од магдонос може да доведат и до проблеми со хемоглобинот кај новороденчето.

Готвениот магдонос е побезбедна опција, бидејќи топлината делумно ги намалува опасните соединенија. Сепак, бремените жени треба да бидат внимателни кога одлучуваат колку и во која форма ќе го вклучат магдоносот во исхраната.