Денеска и официјално заврши сезоната (2019/20) и во Премиер лигата, познати се и останатите учесници кои ќе играат во меѓународните натпреварувања.

Ливерпул веќе ја освои титулата, триумфално го заврши првенството со 1:3 над Њукасл. Редси иако уште од првата минута беа во негатива направија целосен пресврт преку ван Дајк, Орижи и Мане.

Манчестер сити заврши на второто место на табелата, како домаќин убедливо славеше над Норич (5:0), по еднаш во листата на стрелците се запишаа Жезус, Стерлинг и Марез, а двапати Де Брујн.

Во директна пресметка за место во групите на Лигата на шампионите, Манчестер јунајтед со 0:2 го совлада Лестер. Од пенал за предност стрелаше Фернандеш, а во самиот финиш трите бода ги потврди Лингард. Така, „лисиците“ останаа на петтата позиција која ги води во групите на Лига Европа.

И Челси исто така ќе биде учесник во најквалитетното европско натпреварување, лондонските „сини“ завршија на четвртото место во генералниот пласман откако со 2:0 беа подобри од Вулверхемптон. Непосредно пред паузата мрежата на Патрисио успеаја да ја затресат Маунт и Жиру.

Ваквиот пораз на Вулвси му одговараше и на Тотенхем кој одигра реми кај Кристал Палас и со шестото место кое им носи Лига Европа.

Трите екипи кои испаднаа од Премиер лигата и кои ќе играат во Чемпионшип следната сезона се Борнмут, Ватфорд и Норич.

Како што е веќе познато нови премиерлигаши следната сезона се Лидс на Езгјан Алиоски и ВБА, а наскоро преку плејофот во Чемпионшип ќе го дознаеме и третиот патник.

Премиер лига, последно 38 коло
Недела, резултати –

Арсенал-Ватфорд 3:2
Барнли-Брајтон 1:2
Челси-Вулверхемптон 2:0
Кристал Палас-Тотенхем 1:1
Евертон-Борнмут 1:3
Лестер-Манчестер јунајтед 0:2
Манчестер сити-Норич 5:0
Њукасл-Ливерпул 1:3
Саутемптон-Шефилд јунајтед 3:1
Вест хем-Астон Вила 1:1

Конечна табела:

1.Ливерпул 99 бодови (ЛШ)
2.Манчестер сити 81 (ЛШ)
3.Манчестер јунајтед 66 (ЛШ)
4.Челси 66 (ЛШ)
5.Лестер 62 (Лига Европа)
6.Тотенхем 52 (Лига Европа)
—
18.Борнмут 34 (Чемпионшип)
19.Ватфорд 34 (Чемпионшип)
20.Норич 21 (Чемпионшип)