Во последните неколку дена на фудбалските натпревари бевме сведоци на проверка на офсајдот во пракса според таканареченото Венгерово правило. Во исто време, видовме и она на што неволно се навикнавме во последните години – мерење милиметри кои всушност не носат никаква предност за напаѓачот.

И првиот човек на УЕФА, Александер Чеферин, зборуваше за честото погрешно толкување на толкувањата. Чеферин беше гостин на конференцијата Форум организирана во Мадрид од Аполо Спортс Капитал, новиот мнозински сопственик на Атлетико.

– Понекогаш навивачите не можат да ги разберат различните толкувања на правилата што ги гледаат од натпревар до натпревар. Ни јас веќе не ги разбирам. На пример, кога станува збор за играње со рака – никој веќе ништо не разбира. Дали е пенал или не, дали е намерно или не… Како го знаете тоа, не сте психијатар – рече Чеферин, зборувајќи за недостатокот на униформност во судиските одлуки од воведувањето на ВАР технологијата.

УЕФА, вели тој, работи на тоа.

– Се обидуваме да им објасниме на судиите дека одлуката ја носи судијата на теренот. ВАР треба да интервенира само во случај на јасна и очигледна грешка. Овие интервенции треба да бидат кратки, а не како понекогаш во Ла Лига или Премиер лигата, каде што сè трае 10 или 15 минути со прекини – се зборовите на Чеферин.