Бугарија нуди одлични услови за одмор и во исто време е безбедна дестинација, изјави министерот за туризам на Бугарија, Христо Проданов, на отворањето на летната сезона, пренесуваат бугарските медиуми.

-Во претстојната летна сезона очекуваме меѓу 5,5 и 6 милиони туристи. Најмногу посетители ќе има од Полска, Унгарија, Романија, Германија, Велика Британија, Србија, Чешка, Израел и други. Не очекуваме одлив на домашни туристи, бидејќи на многу Бугари им се допаѓа бугарското црноморско крајбрежје, изјави министерот за туризам Проданов на прес-конференција во туристичкиот комплекс Златни Песоци по повод официјалното отворање на летната туристичка сезона, пренесува НОВА.

Проданов истакна дека пораката што сака да ја испрати земјата е оти Бугарија нуди одлични услови за рекреација, а во исто време е и безбедна дестинација. Освен тоа, како што рече Проданов, Црно Море е безбедно и мирно подрачје каде бугарските угостители имаат долга традиција на квалитет и гостопримство во туризмот. Проданов е оптимист за претстојната летна сезона и покрај кризите во последните години.

Според него, промоцијата на сите видови туризам треба да биде исклучително висок приоритет. Заедно со традиционалниот морски и зимски туризам, од исклучителна важност за Бугарија е да го искористи потенцијалот на културеен, бањски, вински и кулинарски туризам, како и здравствениот туризам.

Летната туристичка сезона официјално беше отворена со празнична поворка покрај шеталиштето на туристичкиот комплекс Златни Песоци. Настанот се совпаѓа со 65-годишнината од формирањето на црноморското одморалиште.

На покана на министерката за надворешни работи Теодора Генчовска и министерот за туризам Христо Проданов, над 30 шефови на дипломатски претставништва акредитирани во Република Бугарија го посетија одморалиштето за да се запознаат со туристичкиот потенцијал на Бугарија.