Британија: Се предлага физичките работници да одат порано во пензија
Луѓето со повисок степен на образование во Велика Британија ќе работат подолго, предлагаат конзервативците во Парламентот. Според предлогот, во исто време би им се дозволило на луѓето кои работат физичка работа да одат порано во пензија, пишуваат медиумите.
Властите планираа ново зголемување на старосната граница за пензионирање на сите работници, што предизвика многу реакции во британската јавност и стравувања дека земјата не е подготвена на финансискиот ефект од реформата. Меѓу предлозите беше и на луѓето кои не студирале на универзитет и порано го почнале работниот век, како и на оние кои работат физички напорни работи, да им се дозволи порано да одат и во пензија.
По жестоките реакции во јавноста, Мел Страјд, британскиот секретар за работа и пензии, денеска ја одложи одлуката за зголемување на старосната граница за државна пензија за по изборите, но ја остави отворена вратата за зголемување на возраста на 68 години во следните години.
Возраста за пензионирање во Британија во моментов е 66 години и за мажите и за жените, а Страјд рече дека ќе се зголеми на 67 години, како што е планирано за три години.