Брајан Адамс за односот со принцезата Дијана: Се обидов да ја спасам од сè
Канадскиот музичар Брајан Адамс деновиве откри како се обидел да ја “спаси” принцезата Дијана, пред да умре во сообраќајна несреќа во Париз во 1997 година.
Пејачот кој имал блиски односи со кралското семејство во годините пред нејзината смрт во 1997 година, открил дека се чувствувал како средбата со неа да е една од „најголемите работи“ што некогаш му се случиле, пишува „Дејли меил“.
Дијана, заедно со нејзиниот љубовник Доди ал Фајед и возачот Анри Пол, ги загубија животите обидувајќи се да побегнат од француските папараци, а Адамс во средината на осумдесеттите години на минатиот век ја напишал познатата песна „Дијана“ за нејзиниот брак со тогашниот принц Чарлс.
По нејзината смрт тој ја повлече песната, а сега, 26 години подоцна, ја откри приказната за нивната блиска врска.
„Имавме многу, многу добри разговори, морам да ви кажам. Всушност, тоа е чудно и надреално да се размислува. Навистина, многу ми се допадна Дијана, таа беше неверојатна жена и голема инспирација. Врската со неа е навистина една од најголемите работи што ми се случиле“, признал Адамс во интервју за „Тајмс“ и додал дека некако се обидел да ја спаси од сѐ.