Борба против ковид-19: НАТО и ЕУ ќе испратат 300 медицински лица на помош на Чешка
Чешката Влада одобри план за 300 здравствени лица од земјите на НАТО и Европската Унија (ЕУ) да допатуваат во земјата и да и помогнат во справување со зголемениот број на пациенти со коронавирус.
Дневниот пораст на нови случаи на вирусот вчера се искачи на речиси 15.000, што е речиси 3.000 повеќе од претходниот рекорд што беше поставен ден порано.
За реализација на владиниот план е потребно и одобрување од парламентот, бидејќи станува збор за припадници на странски вооружени сили. Тие ќе помагаат на нивните чешки колеги во Воената болница во Прага и во полската болница со капацитет за 500 пациенти што ја гради армијата.
Првата група од 28 лекари од Националната гарда на САД треба да пристигне следната недела.
Владата доби и 600 респиратори и друга медицинска опрема што е неопходна во единиците за интензивна нега. Министерот за одбрана, Љубомир Метнар вели дека НАТО ќе испрати уште 60 респиратори.
Чешка веќе два месеци се соочува со пораст на инфекции, а третина од случаите се регистрирани во последните седум дена. Вкупно се потврдени 208.915 случаи и 1.739 смртни случаи во земјата од почеток на пандемијата.