Грција, за првпат од 2008 година, издава обврзница со најдолг рок на доспевање, заокружувајќи го целосното враќање на земјата на меѓународните пазари на долг, пренесува „Блумберг“.

– Владата продава 30-годишни обврзници преку банки, што може да биде можност за инвеститорите да соберат приноси што најверојатно ќе бидат највисоки во еврозоната, пишува „Блумберг“, додавајќи дека Грција ги следи другите земји во еврозоната кои во моментов користат ниски трошоци за задолжување за финансирање на пандемично закрепнување.

„Блумберг“ гледа на продажбата на државни обврзници со рок на доспевање од 30 години како знак дека Грција постигнала значителен напредок во изминатата деценија.

Агенцијата додава дека за оваа хартија од вредност имало огромен интерес кај инвеститорите, кои доставиле налози за набавка преку банки во износ од над 17 милијарди евра (20,3 милијарди долари), што ја илустрира нивната долгорочната доверба во грчката економија.