По настапот во финалето во домашниот куп, ракометарите на Охрид наскоро ќе го продолжат настапот во ЕХФ Европскиот куп каде ги очекува полуфинален двомеч против екипата на Целје.

Првиот натпревар ќе се игра во Словенија на 25 април во салата „Златорог“ со почеток од 18.00 часот.

Своите очекувања за првите 60 минути против Целје ги сподели голманот на ГРК Охрид, Бојан Блажески:

– Ни следи полуфиналето со екипата на Целје. Одлична, експлозивна и млада екипа. Немавме многу време да се подготвуваме поради обврските во домашното првенство, па затоа оваа недела ќе го анализираме противникот. Ние како и секогаш ќе оставиме срце на терен и ќе се обидеме од Словенија да се вратиме со што подобар резултат пред вториот натпревар – вели Блажески.

Возвратниот дуел ќе се игра на 2 мај во салата „Билјанини Извори“, и доколку македонскиот претставник биде подобар во оваа пресметка, во финалето ќе игра со Извиѓач (Босна и Херцеговина) или Татабања (Унгарија) на нашиот интернационалец Филип Талески.