Хартиените крпи се идеален начин за чистење на речиси сè, од мрсни дамки што би ги уништиле вашите омилени крпи за садови, до покривање на храната во микробрановата печка за да се спречи прскање.

Но, тие не се секогаш најдобриот избор и можат да остават ситни парчиња хартија или едноставно да оштетат одредени површини. Постојат некои површини каде што едноставно не треба да ги користите, пишува „Рил симпл“.

Не треба да се користат на овие површини

Хартиените крпи го олеснуваат секојдневното чистење, но има неколку површини каде што експертите за чистење велат дека треба да ги избегнувате.

Стакло и огледала

– Никогаш не препорачувам да користите хартиени крпи на стакло или огледала. Повеќето хартиени крпи се направени од дрвени влакна кои се распаѓаат додека бришете, оставајќи ленти и ситни честички – објаснила Џесика Инглиш, експерт за чистење.

Наместо тоа, таа препорачува да се користи квалитетна микрофибер крпа дизајнирана за стакло. Поради густите влакна, крпата ја собира прашината и рамномерно го апсорбира средството за чистење, оставајќи ја површината чиста без ленти или влакненца.

Екрани на електронски уреди

Екраните на компјутерите, таблетите и телефоните се склони кон дамки од отпечатоци од прсти, па затоа треба редовно да се чистат. Но, овие деликатни површини имаат посебна заштита и бараат внимателна грижа. Хартиените крпи се премногу груби и можат да го изгребат екранот.

За чистење се препорачува мека микрофибер крпа, бидејќи отстранува прашина, маснотии и отпечатоци од прсти без гребење. Специјални спрејови и марамчиња безбедни за екрани се исто така опција, особено за тврдокорни дамки.

Древен мебел

Од вашата омилена полица до вашата кујнска маса, дрвениот мебел бара специфична грижа.

– Хартиените крпи се премногу груби и премногу суви за дрвени површини. Влакната можат да создадат микрогребнатини во лакираните или полиуретанските премази, а кога се комбинираат со спрејови, можат да остават ленти или нерамни остатоци. Ако античкиот или луксузниот дрвен мебел често се трие, постепено може да го изгуби својот сјај – објаснила Инглиш.

За дрво, најдобро е да користите микрофибер крпа за повеќекратна употреба или памучна крпа без влакна. Сува крпа ќе собере прашина, додека малку влажна крпа ќе ги отстрани дамките и остатоците, а потоа треба да ја избришете со сува крпа за да ја отстраните влагата што може да остане на дрвото.

Апарати од не’рѓосувачки челик

– Хартиените крпи можат да се заглават во жлебовите, оставајќи остатоци и создавајќи мали гребнатини. Наместо тоа, јас користам мека микрофибер крпа со средство за чистење од не’рѓосувачки челик или мала количина разреден детергент за миење садови – предупредила Инглиш.

Експертот за чистење Кристи Лорд додава дека ова важи и за црните апарати од не’рѓосувачки челик. Тие имаат тенок полимерен слој кој лесно се оштетува од абразиви, а гребнатинките ја откриваат светлата сребрена боја под нив.

Тави од леано железо

Тавите од леано железо имаат груби и нерамни површини. Користењето хартиени крпи речиси секогаш остава мали парчиња хартија на нив, што не е пожелно во храната. Дополнително, хартиените крпи не се доволно силни за правилно чистење на тавата.

Најдобро е да користите четка или стругалка со цврсти влакна за чистење на леано железо и крпа без влакна за да го исушите.