Славната актерка Аница Добра, која ги освои срцата на публиката во регионот уште пред неколку децении, на 3 јуни го прослави својот 63. роденден.

Добра, низ годините помина низ различни фази во својот живот и кариера, а ја паметиме по улогите кои секогаш носеа посебна енергија, шарм и топлина. Својата огромна популарност ја обезбеди со култниот филм „Како пропадна рокенролот“ од 1989 година. Никој не остана рамнодушен и по нејзините улоги во „Црниот бомбардер“ и „Балкан експрес“.

Инаку, таа важи за една од најубавите регионални актерки, позната како секс-симбол во поранешна Југославија.

Иако влезе во седмата деценија и тврдоглаво се спротивставува на трендовите на медицински асистирана „младост“, Добра и понатаму изгледа совршено. Актерката откри дека одржува витка фигура така што се грижи да јаде само сурова, односно жива храна, а речиси секогаш ѝ требаат околу триесет минути за да подготви оброк.

Нејзиниот приватен живот вешто го крие, па јавноста постојано се интересира за него, исто како и за нејзината кариера. Таа со години е во брак со сопругот Миодраг Миќа Софтиќ, кој е нејзин најголем поддржувач. Од бракот со него, таа ја доби ќерката Мина, а пред неколку години станаа и баба и дедо.

Патем, Добра во една прилика сподели спомен од времето кога била млада актерка во подем. Таа раскажала како легендарните актери Милена Дравиќ и Драган Николиќ сакале да ја посвојат.

„Гага ѝ се јавува на Милена и ѝ вели: „Подготви ручек, ти носам малечка, таа е луда како нас. Треба да ја посвоиме, ќе може да нè издржува“, рекла Аница со насмевка, потсетувајќи се на тој ден.