Бени Шаќири нов директор на МКЦ?
Градоначалничката на Скопје, Данела Арсовска го потпишала решението музичарот Бени Шаќири да биде нов директор на Младинскиот културен центар (МКЦ) и тој утрово се појавил таму за да го преземе раководното место од Никола Алексов, но тој одбива да замине, објави Нова ТВ, повикувајќи се на свои извори.
„Слободен печат“ не доби ниту потврда, ниту демант на оваа информација. Единствено добивме потврда дека Шаќири се појавил во МКЦ, без понатамошни детали.
На последниот конкурс за избор на директор во МКЦ стигнале три пријави: музичарот Бени Шаќири, дипломираниот продуцент и филмски работник Никола Мадиќ, кој е сопруг на заменичката-министер за правда Викторија Аврамовска-Мадиќ и Владимир Стојчевски, дипломиран продуцент и професор, магистер по менаџмент на јавни установи. Според процедурата, Управниот одбор на МКЦ ги доставил апликациите од кандидатите до градоначалничката на Град Скопје, со тоа што предлага кандидати кои според критериумите се соодветни за позицијата за која аплицираат. Условите, покрај високото образование во областа на хуманистичките науки, се и 5-годишно работно искуство во областа на културата. Последниот збор за одлуката кој ќе биде директор е на градоначалничката Данела Арсовска.
Досега в. д. директор на МКЦ беше Никола Алексов, дипломиран детектив, кој беше поставен на функцијата во јануари лани откако Арсовска го разреши Ванчо Богоев.