Фудбалерот на Баерн Минхен Хари Кејн и неговиот соиграч голман Мануел Нојер поради повреди би можеле да го пропуштат големото дерби во Бундес лигата против Борусија Дортмунд. Кејн и Нојер ги пропуштија натпреварите меѓу Англија и Германија минатата недела бидејќи не беа доволно опоравени од повредите.

Кејн учествуваше во некои делови од тренингот во средата, откако го повреди зглобот во победата на Баерн над Дармштад од 5:2 на 16 март, кога го постигна својот 31 гол во сезоната.

Нојер на тренингот на германската репрезентација минатата недела го скина мускулот на левата надколеница, а на мечевите против Франција и Холандија го замени Марк-Андре тер Штеген. Баерн објави дека Нојер тренирал индивидуално во средата.

Актуелниот шампион во Бундеслигата, Баерн, во сабота гостува кај Борусија Дортмунд и мора да победи за да ги одржи шансите за одбрана на титулата. Баерн е втор со 60 бодови, 10 помалку од водечкиот Баер Леверкузен на осум кола пред крајот на првенството.

Баерн постигна 23 гола на последните седум мечеви против Дортмунд во сите натпреварувања и нема пораз од 2019 година и германскиот Суперкуп. Последен пат Дортмунд победи на „Алијанц Арена“ во 2014 година, кога тренер беше Јирген Клоп. Дортмунд е четврти на табелата со 50 бодови.

Баер Леверкузен во сабота ќе игра против Хофенхајм на домашен терен. Тимот на Чаби Алонсо и по 26 кола и натаму не знае за пораз и се обидува да ја освои првата титула во Бундеслигата во клупската историја.