Баерн и Челси подготвуваат размена, Лерој Сане се сели на „Стемфорд бриџ“
Германскиот репрезентативец Лерој Сане минатата година се врати во Бундеслигата потпишувајќи за Баерн Минхен по четири години поминати во Манчестер сити, но се поизвесно е дека наскоро ќе се врати во Премиер лигата.
Сане по доаѓањето во Баерн Минхен мака мачи со повредите и досега постигна само шест голови и поради тоа го загуби местото во првиот тим кај новиот тренер Јулијан Нагелсман.
Поради тоа Сане размислува да побара да биде ставен на трансфер листата и посакува да се врати во Премиер лигата, но не во Манчестер сити каде играше четири години, туку гледа кон „Стемфорд бриџ“ и Челси.
Менаџерот на Челси, Томас Тухел нема ништо против доаѓањето на Сане бидејќи одлично се вклопува во неговата филозофија и веќе и порачал на управата на „сините“ да започне преговори со Баерн.
Челси кој сака трансферот да го реализира уште во зимскиот преоден рок, покрај одредена сума на пари е подготвен да понуди и еден од тројцата фудбалери за кои Баерн покажува интерес.
Еден е Калум Хадсон-Одои кој е голема желба на баварците, а не добива премногу шанси иако Тухел верува во него и во летниот преоден рок го стопираше неговиот трансфер во Борусија Дортмунд.
Вториот е Хаким Зијех кој не може да се снајде во системот на Тухел. Според англиските медиуми, Зијех е физички преслаб за тоа што го бара Тухел и поради тоа често има проблеми со повредите. Баерн Минхен се обиде да го купи Зијех уште кога настапуваше за Ајакс, но тогаш Челси беше поконкретен и го донесе на „Стемфорд бриџ“ за 30 милиони евра.
Третиот фудбалер кој би можел да замине во Баерн е Кристијан Пучишич. Репрезентативецот на САД досега не успеа да го замени Еден Азар и иако има само 22 години, „сините“ би се согласиле да го пуштат во Баерн за да пристигне Сане.