Баерн е новиот европски шампион, Коман му се „одмазди“ на ПСЖ! (ВИДЕО)
Вечерва на стадионот „Да Луж“ во Лисабон (Португалија) на завршниот турнир од Лигата на шампионите, во големото финале Баерн Минхен со 1:0 го совлада ПСЖ.
Стрелец на единствениот гол за германскиот претставник беше Коман после асистенцијата на Кимих во 59 минута од средбата.
Интересен е фактот што Коман е роден во Париз, настапува за француската репрезентација и му пресуди токму на својот поранешен клуб за кој настапуваше во периодот 2013-2014 година, но не доби вистинска шанса со само три официјални настапи.
Ова беше прво финале за париските „светци,“ а баварскиот гигант ја освои шестата титула во ова елитно натпреварување и така се израмни со Ливерпул на третата позиција по бројот на европски титули.
Кога сме кај трофеите во ЛШ, второпласиран е Милан со седум, а убедливо на првата позиција на вечната листа води Реал Мадрид со 13 титули.